د فلسطین اسلامي مقاومت غورځنګ (حماس) د اګست په ۱۱مه یوه اعلامیه خپره کړه، چې پکې یې غوښتنه وکړه چې د غزې د اوربند خبرو اترو منځګړي د پخوانیو خبرو اترو د نتيجې له مخې د اوربند پلان جوړ کړي او اسرائیل اړ کړي، چې دغه پلان عملي کړي، پر ځای د دې چې د نورو خبرو یا نوو وړاندیزونو په لټه کې شي.

اعلامیه زیاتوي چې اسرائیل د خبرو اترو په ټول بهیر کې نوي شرایط وړاندې کړي، پر غزې يې بریدونه دوام ورکړی او د حماس د سیاسي شورا مشر يې وژلی، چې دا د اسرائیل د جګړې دوام او د اوربند تړون د نه منلو نیت تاییدوي.

حماس له منځګړو څخه غوښتنه کړې چې د امریکا د ولسمشر جوبایډن د وړاندیزونو او د ملګرو ملتونو د امنیت شورا د اړوندو پرېکړو پر اساس یو تطبیقي پلان وړاندې کړي او اسرائیل اړ کړي چې هغه عملي کړي.