د چين د يوولسم پنځه کلن پلان عمده موخې په سالم ډول تر سره شوې دي.

د چين صدراعظم ون جيا باو د مارچ په پنځمه نېټه د چين د ملي ولسي کانګرس په کلنۍ نوبتي غونډه کې څرګنده کړه چې په تېرو پنځو کلونو کې چين په بريالۍ توګه له نړيوال پولي بحران سره مقابله وکړه، د اقتصاد د ثابت او چټک پرمختګ يې وموند، د انرژۍ د سپمولو او د ککړو شويو شيانو د ايستنې اندازې د کمولو کارونه يې پياوړی کړي او د يوولسم پنځه کلن پلان عمده موخې يې تر سره کړې دي.

صدراعظم ون جيا باو وويل، په تېرو پنځو کلونو کې د چين د ټولنې د توليدي قوت او د هېواد عمومي قوت په ښکاره توګه لوړ شوی دی. د چين د کورنيو توليداتو عمومي ارزښت نهه دېرش زره او اته سوه مليارډو يوانو ته رسېدلی چې د کلنی منځنی زياتوالی انډول يې يوولس اعشاريه دوه سلنه و. دغه راز د هېواد د مالي ګټو زياتوالي له پنځه زره مليارډو يوانو څخه اوښتی دی. د دې ترڅنګ په ښارونو او کليوالو سيمو کې د اوسيدونکو عايداتو د کلنی زياتوالي انډول په سلو کې نهه ته رسېدلی او په ښارونو او کليوالو سيمو کې د ټولنيز ضمانت سيسټم ګام په ګام بشپړ شوی دی. د ون جيا باو په اند، له دغو برياليتوبونو څخه د چين د اصلاحاتو او ورخلاصون ستر قوت څرګندېږي.

دغه راز نوموړي هم منلی چې د ښوونې، روغتيا، د شيانو او کورونو بيې په ساحو کې يو شمېر مسئلې لا هم موجودې دي. هغه وويل، چې حکومت به د دغو مسئلو د حل و فصل لپاره لا کوښښونه وکړي، څو چې د خلکو اړتياوې ژر پوره شي. (غوټۍ)