په بای چي لومړي ښوونځي کې د هوی قوم کلتوري درسونه

((دا خوراک له ممپليو او اوړو څخه جوړيږي، موږ دغه خوراک ته جا کو وايو.))

((زما خور کله کله زما کور ته راځي او زما مور ورته جا کو جوړوي.))

د چين په جنوب ختيځ کې د سمندر پر غاړه د فو جيان ولايت د چوان جو ښار په بای چي علاقه دارۍ کې د يوه ښوونځي په درس خونه کې زده کوونکي د جا کو په نوم يو ډول ځايي دوديز خوراک جوړوي او د دې خوراک د تاريخ په اړه خپلو کې بحث کوي. دا د بای چي مرکزي ښوونځي يو عام درس نه دی، بلکې يو ځانګړی کلتوري درس دی چې پرمهال يې د ځايي هوی قوم تاريخ او دودونه معرفي کيږي او د زده کوونکو ډېر خوښ دي.

د جا کو په نوم د ځايي دوديز خوراک د جوړولودرس د ځايي هوی قوم له يو لړ کلتوري درسونو څخه دي. ښوونکې ګو مياو لينګ د دغو درسونو په ترتيبولو کې ګډون کړی، ولې د علاقه داري په يوه ښوونکي د هوی قوم په اړه کلتوري درسونه ورکول کيږي؟ دا د بای چي علاقه داري له تاريخ او کلتور سره تړاو لري. بای چي علاقه دارۍ له هو جو بندر سره چې د چين په لرغونې زمانه کې لومړی لوی بندر و، ډېر نژدې دی. له سلګونو کلونو په ترڅ کې ډېر عرب او د فارس سوداګرو د سوداګرۍ لپاره هو جو بندر ته تګ راتګ کاوه او هلته يې ځينو په دايمي توګه پاتې او استوګنه غوره کړه. دا چې د بای چي ٨٠٪ نفوس هوی قوم وو، نو په ١٩٩٠ کال کې بای چي په رسمي توګه د هوی قومي علاقه دارۍ په توګه وټاکل شوه او تراوسه پورې يې د فوجيان ولايت يوازينۍ هوی قومي علاقه داري هم ده.په بای چي کې د هوی قوم اوسيدونکو د کوښښونو له لارې ځايي اقتصادي پرمختګ چټک شوی او له همدې له امله د چين د نورو ځايونو ډېر خلک دلته جلب شوي دي. د اوږدې مودې راهيسې، په بای چي کې بېلابېل قومونه په ګډه سره ژوند کوي. خو په چټک پرمختګ او د نفوس په زياتېدو سره ځايي کلتوري عنعنات ګام پر ګام ورک شوي او د هوی قومي علاقه دارۍ د کلتوري عنعناتو ساتل او مروجول يوه بېړنۍ دنده ده. د بای چي مرکزي لومړي ښوونځي د ځايي حکومت د ښوونيزې ادارې په ملاتړ د هوی قوم کلتوري درسونه ترتيب کړي دي، د ښوونځي مشر وو څای جونګ په دې اړه وويل:

(( په دغو ځانګړيو درسونو کې څو برخې شاملې دي، لومړی تاريخ ، دوهم دودونه، درېيم ځانګړې قومي جامې، څلورم د بای چي د هوی قوم اقتصاد، پنځم د بای چي د راتلونکي پرمختګ پلان.))

د بای چي مرکزي لومړی ښوونځی په فو جيان ولايت کې يوازينی هوی قومي ښوونځی دی او اوس څه باندې ديارلس زر زده کوونکي لري چې زياتره يې د هوی قوم او يو شمېر يې د هان قوم، بای قوم، مياو قوم او داسې نور دي. په ښوونځي کې د حکومت په مالي مرستې څو ښوونيزې ودانۍ د جوړېدو په حال کې دي او د هوی قوم ځانګړتياوې ترې ښکاريږي. د ښوونځي مشر وو څان جونګ وويل:

((حکومت پنځه مليونه يوانه برابر کړي او دا زموږ قومي ښوونې ته د حکومت لومړيتوب ښکاره کوي.))

مشر وو همدانګه دا معلومات ورکړل، چې ښوونکي لاهم د دای چي د هوی قوم د کلتوري درسونو کتابونو د لا بشپړولو په هڅه کې دي، ځکه چې د دغو درسونو له لارې ځايي دودونه په ښه توګه وپېژندل شي او د هوی قوم کلتور نور هم وساتل شي.

20150107msl.m4a