د چين مشهور سرحلی ښار چينګ داو

چينګ داو چې د چين په ختيځ شان دونګ ټاپووزمه کې پروت دی ، د چين په زياتو ساحلي ښارونو کې د په زړه پورې سمندري منظرو او مناسب اقليم له امله ډېر مشهور دی او ډېرې اوږدې سمندري کرښې لري چې د ساحلي خطونو او ټاپوګانو په ګډون عمومي اوږدوالی يې اته سوه او اويا کيلومتره دی چې له دې جملې څخه د ساحلي کرښې اوږدوالی يې اووه سوه او دېرش کيلومترو ته رسېږي او د شان دونګ ولايت د سمندري کرښو له عمومي اوږدوالي څخه يو په څلورمه برخه نيسي.

که سيلانيان چينګ داو ته سفر وکړي، همېشه د دې ځای د مناسب اقليم لوړه ستاينه کوي. څرنګه چې چينګ داو د معتدلې سيمې د موسمي باد په ناحيه کې او د سمندر پرغاړه واقع دی، نو اب و هوا يې د خلکو د اوسيدلو لپاره ډيره مناسبه ده. د خلکو په خولو ويل کېږي چې چينګ داو په دوبي کې تود نه دی او په ژمي کې يخ هم نه دی. سره له دې چې دغه ښار د چين په شمال کې پروت دی. نو چينګ داو په دوبي کې له ګرمۍ څخه د ځان ساتلو لپاره ښه ځای دی. د دوبي په موسم کې د چينګ داو منځنی تودوخه د سنټيګراد په حساب درويشت درجې ده، او په اګست مياشت کې چې په چينګ داو کې د حرارت درجه تر ټولو ډېره لوړه ده، يوازې په منځنۍ ډول پنځه ويشت اعشاريه يو درجې ته رسېږي. نو ويل کېږي چې دوبی په چينګ داو کې د سيلانۍ ښه موسم دی.

د (( با دا ګوان )) په نامه منظرې لرونکې سيمه په چينګ داو کې يو ډېر مشهور ځای دی. په دې ځای کې سيلانيان کولی شي چې له شنو ونو، غوړېدلې ګلانو، پاکې هوا او په زړه پورې چاپيريال څخه خوند واخلي. د يادولو ده چې په با دا ګوان سيمه کې ډول ډول ښکلۍ بنګلې قطار په قطار ولاړې دي چې ساختماني بڼې يې د روسيې ، بريټانيا ، فرانسې ،جرمني او جاپان په شمول د شلو هېوادونو په ځانګړتياوو پورې اړه لری.، نو دغه ځای د سلګونو هېوادونو د ساختماني موزيم په توګه هم بلل کېږي.

د٢٠٠٨ کال لپاره د نهه ويشتمې دورې دوبنيو اولمپيک لوبو او د معيوبينو د ديارلسمې دورې لوبو د بادبانی کښتۍ اډه د چينګ داو ښار د فو شان په خليج کې پرته ده او مخامخ يې د دغه ښار د نمونې په توګه د می د څلورمې په نامه ډګر دی. دغه اډه پنځه څلوېښت هېکټاره ځمکې نيولې چې له دې جملې څخه د بېلا بېلو سپورټي مرکزونو پراخوالی له دېرش هکتارو څخه زيات دی.

لاو شان غره چې په چين کې د تاويزم له امله شهرت لري، د چينګ داو ښار په ختيځه برخه کې پروت دی. د لاو شان غرنی منظرې لرونکی سيمې پراخوالی څلور سوه او شپږ څلويښت مربع کيلومترې ته رسېږي چې له دې جملې څخه د سمندري کرښو اوږدوالی اووه اتيا اعشاريه دري کيلومتره دی. د لاو شان غره عمده څوکه لوړوالی يو زر او يو سل او دری دېرش متره دی، که څه هم لوړوالی يې تر ټولو ډېر لوړ نه دی، خو د سمندر پرغاړه منظرې او ډول ډول ونې د نورو غرونو په پرتله ډېرې ځانګړتياوې لري. د معلوماتو له مخې، په دغه سيمه کې يوازی لرغونی ونې شمېر له يو سل او لس څخه زيات دی چې په کې د ډېرې زاړې ونې عمر له دوه زره او پنځه سوو کلونو څخه زيات دی. د چين په تاريخ کې ډېر زياتو شاعرونو او ليکوالو د لاو شان د په زړه پورې منظرو څخه خوند اخيستی دی او په دې اړه زياتې شعرونه او ليکنې يې ليکلي دي.

ټولو ته معلومه ده چې د سفرونو په ترڅ کې د ځايي خوراکونو خوړل د سيلانۍ يو مهم پروګرام دی. نو کله چې تاسې چينګ داو ته سفر وکړئ، خامخا به تاسو ته د (( پي چای يوان )) په نامه واټ دروپيژنم. ځکه چې سيلانيان د دې واټ په رستورانتونو کې د چينګ داو ځايي ډېر خوندور خوراکونه خوړلی شئ. په تېره بيا د کب کباب يې ځانګړی خوند لري.