چین او افغانستان اقتصادي او تجارتي موافقې لاسلیک کړې

تاند(چهارشنبه/مارچ۲۴) د افغانستان او چین مشرانونن(چهارشنبه) د اقتصادي او تجارتي همکاریو موافقې لاسلیک کړې، او ژمنه یې وکړه چې په منځنۍ اسیا کې به له ترهګرۍ سره د مبارزې لپاره لا سختې هلې ځلې وکړي .

د افغانستان ولسمشرحامد کرزي او د هغه چینايي ساري هویانتاو ،په داسي حال کې چې د افغان او چینايی مقاماتو له لوري یې د اقتصادي او تجارتي موافقو لاسلیکېدا څارله ،ژمنه وکړه چې په سیمه کې به د امنیت ساتنې لپاره همکارۍ زیاتوي .

د چین مرکزي تلویزیون د ولسمشر هو له قوله وویل : « چین به تل د خپل حاکمیت، خپلواکۍ او مځکنۍ بشپړتیا د ساتنې لپاره د افغانستان د هلوځلو ملاتړ کوي.»

د چین ولسمشرهمداراز وویل : « دواړه خواوې باید د دې لپاره چې په سیمه کې سوله او ثبات ټینګ پاتې شي په فعال ډول له ترهګرۍ، بېلتون غوښتنې ، مذهبي افراطیت او له پولو دباندې منظمو جرمونو سره مبارزه وکړي .»

ښاغلي هو د دې په څنګ کې چې د کانونو، کرنې، برېښنا، اوبه لګونې او نورو بیخ بینايی پروژو په برخو کې له افغانستان سره پر اقتصادي همکاریو ټینګار وکړ ، د ژورو سیاسي اړیکو او د دواړو خواوو د مشرانوترمنځ د لا زیات تګ راتګ غوښتنه وکړه .

دا چین ته د ولسمشرکرزي درېم رسمي سفر دی خو هیڅ ځل د چینايی چارواکو له لوري یې نه دومره هرکلی شوی وو او نه داسي د همکاریو ژمنې ورکړای شوې وې .

د چین د تلویزیون له راپور سره سم د افغانستان ولسمشرحامد کرزي هم وویل : « چین د افغانستان او سیمې په ثبات کې ډېرمهم رول لوبوي. افغانستان د سولې او ثبات د پیاوړتیا لپاره لېواله دی چې له چین او د سیمې له نورو هیوادونو سره همکاري وکړي .»

افغان ولسمشر همداراز وویل :« افغانستان په دې ویاړي چې د چین په شان ګاونډی او دوست لري .»

کرزي همداراز ژمنه وکړه چې په افغانستان کې به د چینايي کمپینو او پرسونلو ساتنه ډاډمنه کړي .

د چین ولسمشر وویل :« زه ډاډه یم چې ستاسو(کرزی) سفر به یقیناً د چین او افغانستان ترمنځ عملي همکارۍ زیاتې کړي اوزموږ ترمنځ به همکاري او هراړخیز مشارکت نوې سطحې ته لوړ کړي .»

د چین ولسمشر ښاغلي هو همداراز له افغانستانه وغوښتل چې په شانګهای تړون کې لوی رول ولوبوي . په دې تړون کې د منځنۍ اسیا پر هیوادونو سربېره چین او روسیه غړیتوب لري خوافغانستان د دې تړون په غونډو کې د څارونکي په توګه ګډون کوي .