د چین صدراعظم ولسمشرکرزي ته په ټولو برخو کې د مرستو ژمنه ورکړه

تاند(پنجشنبه/مارچ۲۵) د چین صدراعظم وین جاباو نن د ترهګرۍ او د مخدرو موادو د قاچاق پر ضد له افغانستان سره د ګډې مبارزې د غوښتنې په ترڅ کې ژمنه وکړه چې د افغانستان له بیارغونې سره به مرستې زیاتې کړي .

وین جاباو په پیکینګ کې د افغانستان له ولسمشرحامدکرزي سره په خبرو کې وویل دواړه هیوادونه باید په ټولو برخو کې خپلې اړیکې او همکارۍ پیاوړې کړي .

د چین د مرکزي تلویزیون د راپور له مخې ښاغلي وین جاباو ولسمشرکرزي ته همداراز وویل :« تروریزم او د مخدرو موادو قاچاق هغه مشترک خطر دی چې افغانستان او ګاونډي هیوادونه یې ورسره مخامخ دي او د دې ستونزې د مخنیوي لپاره د ټولو هیوادونو اوږدمهالو، نژدې او بې پایه همکارۍ ته اړتیا ده.»

ده همداراز وویل : «موږ باید هڅه وکړو چې خلک سره یو لاس کړو او تر وسه وسه تروریستان ، بېلتون غوښتونکي او مذهبي افراطیون ورټو او د پولو دباندې جنایتکاران وځپو.»

د چین صدراعظم همداراز وویل چې هیواد به یې له افغانستان سره مرستو ته دوام ورکړي او د افغانستان د بیارغونې د سوله ییزو پلانونوملاتړ وکړي .

د افغانستان ولسمشرحامد کرزي له چین څخه د ملاتړ په خاطر مننه وکړه او له چین څخه یې وغوښتل چې د افغانستان په کرهڼه، اقتصاد ،سوداګرۍ ،پانګونه، کانونو او د بیخ بناو په رغونه کې خپلې مرستې زیاتې کړي .

ده همداراز وویل چې افغانستان لېواله دی چې له چین سره په ګډه د تروریزم او مخدرو موادو پرضد مبارزه وکړي .

پرون (چهارشنبه) ولسمشرکرزي د چین له ولسمشریاوینتاو سره ولیدل .په دې کتنه کې د چین ولسمشر هو وویل : « چین به تل د خپل حاکمیت، خپلواکۍ او مځکنۍ بشپړتیا د ساتنې لپاره د افغانستان د هلوځلو ملاتړ کوي.»

د چین ولسمشرهمداراز وویل : « دواړه خواوې باید د دې لپاره چې په سیمه کې سوله او ثبات ټینګ پاتې شي په فعال ډول له ترهګرۍ، بېلتون غوښتنې ، مذهبي افراطیت او له پولو دباندې منظمو جرمونو سره مبارزه وکړي .»

ښاغلي هو د دې په څنګ کې چې د کانونو، کرنې، برېښنا، اوبه لګونې او نورو بیخ بینايی پروژو په برخو کې له افغانستان سره پر اقتصادي همکاریو ټینګار وکړ ، د ژورو سیاسي اړیکو او د دواړو خواوو د مشرانوترمنځ د لا زیات تګ راتګ غوښتنه وکړه .

همداراز نن په یوه جلا کتنه کې د افغانستان دفاع وزیر سترجنرال رخیم وردک د چین له دفاع وزیر لیانګ ګوانګلي سره وکتل . په دې کتنه کې د چین دفاع وزیر افغان ساري ته د پوځي مرستو وعده ورکړه .

د چین د خبري اژانس سین هوا د راپور له مخې د دغه هیواد دفاع وزیر وویل چې دا هیواد به د افغانستان له ملي اردو سره مرستو ته دوام ورکړ څو د افغانستان ملي اردو د خپلې خاورې، ملي حاکمیت اوخپلواکۍ د ساتنې جوګه شي .

په راپور کې د چین پوځي مرستې په دقیق ډول نه دي څرګندې شوې خو ویل شوي چې دې هیواد د افغانستان ملي اردو د اکمالاتو په څنګ کې د افرادو روزنې ته تیاري ښوولې ده .