کرزی: د نيالګيو په کېنلو د چاپېريال د ککړتيا مخه ونيسئ

افغان ولسمشر حامد کرزي په خپلې اوونيزې راډيويي وينا کې له خلکو وغوښتل چې د نيالگيو په لگولو دې د چاپېريال د ککړتيا مخه ونيسي .

ولسمشر کرزى وايي د افغانستان چاپېريال له گڼو گواښونو سره مخامخ دى چې د ده په وينا د نه پاملرنې په صورت کې د يوشمېرناروغيو د خپرېدو لامل کېداى شي .

افغان ولسمشر له افغانانو وغوښتل چې د يوه نيال په لگولو دې د دغه گواښ د خپرېدو پر وړاندې جدي مبارزه وکړي .

ولسمشر کرزي وويل په دې وروستيو کلونو کې د چاپېريال د ککړتيا له امله د خلکو ژوند له گواښ سره مخامخ شوى چې پر وړاندې بايد د ده په وينا جدي مبارزه وشي :

(( په دې وروستيو کلونو کې زموږ چاپيريال گڼو خطرونو تهديد کړى او لا يې هم تهديدوي. چاپيريال ته نه پاملرنه هيواد له گڼو ناروغيو او آفاتو سره مخامخ کوي چې مخنيوى يې د هيواد د هر يوه وگړي دنده ده . د چاپېريال ساتنې يو مهم او آسانه لار د هيواد سر سبزي،د نيالگيو لگول او د باغچې جوړول دي . ))

ښاغلي کرزي وويل د نالگيو نالول نه يوازې د چاپيريال د سمسورتيا لامل کيږي بلکې د کورنيو او په تيره بيا د هيواد له اقتصاد سره هم مرسته کولاى شي .

ښاغلي کرزي د چاپېريال ساتنې لپاره تر ټولو اسانه او گړندۍ لار د نالگيو لگول په گوته کړل چې په وينايې کولاى شي د ناروغيو د خپرېدو مخه ونيسي :

((نن چې زموږ هېواد د ونو او ځنګلونو د غوڅولو له امله د چاپېريال د ککړتيا له ګواښ سره مخامخ دی، دا زموږ مسؤوليت دی چې د تېرو کلونو په پرتله سږکال د د نيالګيو کېنولو او د هېواد سمسورتيا ته ډېر پام واړوو. ))

ولسمشر کرزي همدارنگه له حکومتي او ناحکومتي ادارو وغوښتل چې د لگول شويو ناليگيو ساتنې ته جدي پاملرنه وکړي .

افغان دولت د هر کال د سپرلي په راتلو سره د هېواد د زرغونولو لپاره د ورته بهير اعلان کوي او له افغانانو غواړي چې يو يو نيالگى پخپلو سيمو کې ولگوي .

د افغانستان د کرنې او مالدارۍ وزارت په پام کې لري چې سږ کال په دغه هېواد کې ٢٥ ميليونه نيالگي ولگوي .

د دې پروګرام لويه موخه دا ده چې د هېواد هغه سيمې په شنو ځنګلونو سمسورې شي، چې د تېرو لسيزو په جګړو کې پر خړو ډاګونو اوښتې دي .

(دغه خبر د بې بې سي د پښتو له ويبپاڼې څخه راغلی دی)